‑Cɛn' 'ʋn "dbii
34
Dafi 'a 'dʋ. Dafi nʋɛ ɔɔ' ‑cɛ" sɩɩan nʋɩ 'ʋn 'de Abimelɛkɩ "juɛi ‑bo ɛ nɩ kan' ‑wɛe ɔ 'jeɔ "itai, 'bo ɔ blee 'dʋ ‑nɛ.
2 'Ma muɛ Nyɔsoa 'sɛ poa'
'de nɔ" "oo nɔ" ‑wee'‑ "klein 'di.
'De 'dɔe ɛ nʋa ɩ se 'de 'ʋn 'wɔn ‑pɔn.
3 Nyɔsoa mɛ ‑nɩ 'ʋn 'de,
ɛmɛ ‑tɩ 'ma "koo "kpei 'ma na,
‑bo wɛenyʋ 'wɔin ɛ, ʋʋa muɛ 'mʋa‑ nʋa'.
4 Ao ke 'mɔ ke‑, ‑a ‑bɛɛ' Nyɔsoa 'a 'nynɩ "i,
‑a ‑wee'‑ bee o ‑wɛe ‑a ‑je ɛɛ' 'nynɩ "i 'bɛɛ‑ ‑tadue.
5 'Ɩn "biia 'de Nyɔsoa o 'sʋ ɛ,
ɛ kpʋn 'ma baewlu 'mɛ,
‑wɛe dɩ "klein ‑ɩa faʋn a nʋa 'ʋn ɛ,
ɛ ‑sɩɩ ‑wee'‑ ‑jei".
6 Nyɔ ‑bi" a 'de Nyɔsoa o ɛ, ɔɔ' "juua a fan'
‑tɩn' se ɔ "i 'dbaa i.
7 ‑Bo wɛenyɔ po Nyɔsoa ‑too" "i ɛ,
ɛɛ 'wɔn 'ɛ, ‑wɛe ɛɛ ‑sɔ ‑sɔɔngbɛ ‑wee'‑ "jru.
8 Nyʋ ‑ʋʋ ‑nɩa Kea 'a 'cɛ ɛ,
ɛɛ "sooa a fuɛ ʋʋpʋ‑ i, ‑wɛe ɔɔ ‑sa' ʋʋpʋ 'de 'kle 'di.
9 Ao ‑tɩɛɛn' i, ao 'jeɛ 'je,
ka Nyɔsoa nmɔa 'diwɔn ɛ.
'Mʋa‑ nʋ nyɔ ‑wlaa' Kea sro' ɛ.
10 Nyʋ "klein ‑nɩa Nyɔsoa 'a 'cɛ ɛ,
ʋʋ ‑te' ɛɛ' ni', dɛ ‑nʋɛ,
nyʋ ‑ʋʋa ‑tea' ɛɛ' ni' ɛ,
dɛ 'ɛ ‑pɔn ʋʋpʋ 'kwa.
11 'Mɩɩɛ 'bɛɛ ɛ 'je ‑plaa ‑tɔɛ nʋ,
'kaa nyʋ ‑tea' Kea ‑kwlɩ" ‑mʋ 'kwa 'a ‑pɔn.
12 'Ma "nynuu‑, ao po 'ma wlu doun" o,
‑wɛe 'ɩn 'je aopʋ‑ Kea 'a ni' ‑tea' tɔɔ‑
13 Nyɔ ‑nɩɛ "i ‑ɔ ‑je 'kmʋ ‑kwle ɛ‑?
Nyɔ ‑nɩɛ "i ‑ɔ ‑e 'mʋa‑ 'ʋn nɩ ɛ‑?
14 Ɔ ‑tu" ɔɔ' mɩɩɔn' ‑tɩ',
‑wɛe sɩ ‑tɩ je ɔ 'wɔn jii‑.
15 ‑Ɩn ‑tɛɛn dɛsaʋn kɩɩn, ‑ɩn nʋ dɛ 'dɔe,
‑ɩn ‑pɔn pɛe 'a blua' i 'de nai" 'bleea' 'ʋn.
16 Nyɔsoa 'a "jri nɩɛ nyʋ ‑srɛai" ‑pʋn",
'kaa nyʋ ‑ʋʋa nʋa dɛsaʋn ɛ,
ɛɛ ‑sa ʋʋpʋ‑ "jriɛ ‑pʋn", ‑wɛe ɛ 'je
ʋʋa' 'nynɩ mɔɔ' ‑cɛ" 'de 'blʋa "kpei ‑sa.
17 Tʋ "bo a ‑saa 'diwɔnyniʋn "jriɛ i,
‑wɛe ʋʋa' 'nynɩ 'je i sɔn 'de 'blʋa "kpei.
18 Nyʋ ‑ʋʋ ‑srɛai" ‑bo ʋʋ 'da,
Nyɔsoa a 'wɔn ʋʋa' 'dawlu 'mɛ
‑wɛe ɛɛ ‑seie ʋʋpʋ‑ 'de 'kle 'di.
19 Nyʋ ‑ʋʋa pɛe cɛan mlɛʋn" ɛ,
Nyɔsoa nɩɛ ' ‑wi" ‑mʋ ‑pʋn"
'de nyʋ ‑ʋʋa pɛe "kaea "jrii ɛ nɩɛ 'e ‑wi" ‑mʋ ‑pʋn".
20 Nyɔ ‑srɛai" a jii 'e 'kle ‑tuu" ‑tuu ‑mɛ,
'kaa Nyɔsoa a ‑seiɔ' jeejee.
21 Ɛɛ siɛ ɔɔ' 'kpɩ mɩ 'a ‑cɛ" "jriɛ o, ɩa' jrɛ' se ‑crai.
22 'De dɩsaɩn nʋʋ ‑wi" ‑mʋ ɛ,
ʋʋa ‑cɛ" 'ɛ dɩsaɩn mɩ ‑ɩa mu ʋʋpʋ‑ i ‑saa',
nyʋ ‑ʋʋ ‑nyɩa Nyɔsoa 'a 'cɛ 'ʋn ɛ,
ɛɛ muɛ ‑wi" ‑mʋ 'daɩn "kpei jaa'.
23 'Kaa Nyɔsoa a 'pʋʋ ɛɛ' dbonʋʋn 'mɛ.
Nyʋ "klein" ‑wlaa' ɛ sro' ɛ 'pee
se ʋʋa' due' koun ‑gbai' ka kpʋn i 'nɔ 'kmʋ.